29/10(六)
一早六點左右便起床了，見到沒有雨便想懶一會床再去影沒有人的白川鄉，大約六點半換好衫想出門時又落雨喇……
只好返回房再瞓個回籠覺。
8:00早餐時間，朴葉味噌，另外有一個爐子可以燒魚同魚餅，果塊板仔超熱，條魚仔幾好食。
食飽早餐便退房，沒有雨但好重霧氣，我們再去城山展望台
剛好見到他們換屋頂，好得意
我用模型模式影佢地仲得意
好可惜，白山超級林道最靚果段始終無緣影下來
不過雨後的瀑布更有睇頭
可能是星期六的關係，沿路都好多車入來，若換今天來可不能像昨天那樣，喜歡停車便停車
之後我們一路出發去東尋坊TEL：0776825515
車程大約2小時
但電話只到我們去到附近之燒烤場，但去到那兒睇路牌都非常易找
到附近時，我老公好疑惑，佢話點解仲未見到個海，點知就係我們等紅綠燈時，突然前方一個巨浪打上岸邊激起大大的浪花，我們在未見到海的情況下先見到浪花
我們在岸邊停車，影海浪
大風到我有一點點站不穩
D 浪真係大得好恐怖
當我老公驚嘆緊呢個奇景時，我同佢講呢度咁大浪所以係日本出名既自殺名勝時，佢呆一呆問我，咩名勝話？我再講多次後佢就話咁來得呢度自殺肯定好決絕，同埋跳落去絕對係死路一條。
拍了一會便急急上車，實在係太大風喇，吹到好凍
去到東尋坊有餐廳工作人員指示我們停在他們停車場，我們有點疑惑，一邊表示我們要去東尋坊不是食東西，對方又不斷表示沒有問題，原來穿過他們餐廰是一條捷徑去東尋坊，當然喇叫你們穿過去是希望可以吸引客人買些小食、手信….
我們先去海鮮街，買了一隻蟹，今天是蒸熱食
點左海膽、燒生蠔同蜆仔
全部都超新鮮，蜆仔好味到我們再點多轉
再加點多一個蟹腳湯，嘩超鮮甜
呢度D 海鮮真係超新鮮，係呢個旅程中最好食的，絕對值得來，食左咁多野呢餐只係￥7050咋！！！點解可以咁平同咁好食架~~~~~
食飽飽便順路睇下個海邊，其實安排來東尋坊主要係想食海鮮，觀光就一般。所以睇左兩眼就走了，但老實講我就冇膽好似D人咁企咁近個海囉
之後便出發去山中溫泉
我們今晚住宿吉祥亭 TEL：0761782223
由於是星期六的關係好貴，￥46000
車程大約45MINS左右
傳統溫泉服務好好，到達門口會有女將接行理、有專人幫我們泊好部車
在大堂食過茶點便帶我們入房
房間超大間，仲有個好大既玄關位放行理，而且有自己的檜木風呂
安頓後我們便外出逛朔仙溪，相信若是紅葉時節會更漂亮
到達川床時正巧四時是他們的關店時間，無緣感受一下川床的感覺
返回大路便由溫泉街步行回旅館（旅館給了我們一些換領票，可以於溫泉街上找出相關之店鋪免費換領指定之食品或飲品）
溫泉街盡頭是溫泉泉源，當地人便在此建立兩個公眾浴場
旅館有提供毛巾、手提籃等方便我們到此浸浴，但我們興趣不大
反而當日應有跑步運動，見浴場外擺了幾個攤位，似是給運動員補給，但亦有當地村民進食，味道很香，貪吃的我們在附近徘徊但見沒有人邀請我們，便知道應不是可以隨便食的。
我們浴著溫泉街找可換領之店鋪，其中一間是肉店
可以換領炸牛肉薯仔餅一個，超好食，但我們太肚餓唔記得影相
我們另外仲加買左魚餅都好好食
之後去左一間日本酒店舖用券換試飲
返去旅館便安排按摩時間，由於想飯前按摩，但最快有技師之時間又會錯過晚餐最後入席時間，接待處非常好地表示晚餐可以替我們安排在八點，所以我們先法泡溫泉
溫泉太多人，可以參考官網
溫泉水夠熱，亦十分細心地備有圍巾，方便女士睇河邊風景
泡完便到酒店戶外區域領取一杯免費的生啤，有一些類似嘉年華兒童的攤位，但亦有幾個日本少女玩得不亦樂乎
之後我們便上房按摩，泡完溫泉按摩真係好舒服
之後便到餐廳晚餐，係蟹鍋呀……好鮮味
個蟹鍋好甜，我們一邊食一邊討論之後如何問他們取飯煲粥，原來唔駛，係包埋呢個咁美好嘅安排，但我們果一刻真係已經飽到上心口，但真係超級無敵好好食，最後我食左一碗，老公食左兩碗
果晚室外都幾凍
之後返上房係自己個檜木溫泉浸，睇佢細細個咁，但原來兩個人浸都好寛敞，如是者又一日
沒有留言:
張貼留言