所以就係大年初三至初七(18/2-22/2)氹我老闆陪我去我想去好耐嘅首爾，由於天氣都比較凍，所以此行主要係食同行街，室內活動為主，差D想CUT 埋景福宮，但去到天氣都OK，唔算凍到頂唔到，所以照去。
最搞笑出發前一晚我先發現唔記得自己係邊間租左WIFI BB，又唔見左個確認電郵，惟有去到機場試下問，去到發現原來得四間，咁 逐間問都好容易，其實我估係其中一間，所以先排果間，好彩真係~~~~~~
第一日 18/2 早上坐 9:15國泰的班機，班機好爆，我48小時前ONLINE CHECK IN，已經冇連埋一起的坐位，我同老公分別被安排坐係兩個倉嘅第一行，雖然空間加長，但就分開好遠。當日早D去機場問下有冇得調，空姐話好爆，但都即管落調位要求。
機場都爆多人，食早餐都好難搵位。
由於係 333設計，與我同排的是一對夫婦，我便問下走廊邊的那位先生是否一人，該韓國先生好好肯同我老公調位，雖然隔左個走廊但都好過隔個倉吖。
三個幾鐘機食下瞓下好快過，入境過程超快速，基本上不用等侯。但行李返而就等左一段時間才有
落機後便在機場換錢，大家都話係明洞換錢抵，但我又懶搵而且又唔換得多，所以隨便換D便算。
我們住係東大門JW MARRIOTT ，之前見人寫過從機場坐地鐵都好易到達，所以我們便坐機場快線。睇住黃色指示牌好易搵
由於30MINS 一班，所以打算先問左下一班車幾時，再食少少野食，因為都幾餓下，但賣票小姐話仲有 9 MINS就開，我們便去追，去月台望下張票見係第一卡，但月台又有道幕門隔住左行唔到去，列車到時我便四處張望睇下係咪可以係第三卡行過去，點知就係咁分左心，左腳同行李都上左列車，右腳想行時差左落月台條縫度，原來佢地鐵D縫好大架，我成條右腳跌左落去，要我老公架住我腋下先上得番來，pat pat 勁痛之餘又樣衰。
經歷小波節後話咁快就去到首爾站，其實票價都幾平，兩個人W19000，$140港幣左右咋喎。
我們轉四號線去東大門站，但原來行去轉線係好遠架，又要上落樓梯，我們即時決定回程時坐的士去首爾站。
韓國地鐵讓我們深深體會到韓國大媽、呀叔、老人家嘅威力，人家明明好守規距咁企係車廂外嘅 旁邊等待其他乘客先落車，D人明明仲落緊車，後面嘅呀伯可以老實不客氣地一掌推開你上車。而且幾日間不只一個。。。。
同埋都幾經常見到醉酒叔叔，果日只係下午已經飲醉~~~~
係四號線出9號出口便是酒店旁邊，8號近D正門，兩者都有扶手電梯，非常重要呢!
登記後便上房，房間好大，設備都充足
夜晚係房望出去好靚架
之後便去10樓行政酒廊食D野，因為連住四晚所以包行政酒廊早餐同Happy Hour，Happy Hour 時段有紅白酒同香檳都係免費的。而且D野食每日都唔同架。
食左少少野頂頂肚便出去正式覓食
我們第一餐決定去往十里站嘅 貝殼倉庫，係往十里站出11號出口，直行一會兒便到達，我們大約6:30到，已經要排隊，排第二。但當日可能工作人手不足，只有兩三個員工在工作，所以餐廳其實有不少空檯，但都未能夠安排入坐，等左大約20MINS 便可以入座了，其實便是安排我們坐之前見到的空檯.......我們入座時，排隊等位嘅人龍已經好長
佢有兩隻碟叫你一隻取海鮮另一隻取肉食，鐵板是烤肉，海鮮放在網上烤
飲品自取，最後放入綠色籃，埋單時才一次過計數
佢真係好多唔同種類嘅貝類....見到都心花怒放~~~
D鮑魚仲係識郁架~~~放在去燒多生猛
帶子真係超大隻
全部貝類都好新鮮，係生蠔麻麻地
肉類就非常一般，而且放在鐵板上烤，沒有焦香味，所以我們都冇乜點食，而且見唔到之見大家話嘅章魚
牛油芝士粟米就好好食
食左幾轉，都覺得夠皮，唔想一下子食太多貝類，而且仲有下場
其實佢價格都真係幾平，但真係要早來
而家一邊打一邊好想返去再食過.......
之後我們便坐地鐵去明洞行街
經歷過今日，我老公已經受夠了地鐵，轉線行好遠仲要上落樓梯，月台上地面又唔一定有升降機，大腿酸到爆炸。
係明洞行街，行左DAISO，買左幾隻碟同幾件小工具
之後係街邊食左串魚串，冇特別，係啖湯幾甜
行行下就突然發現我們嘅目標百濟參雞湯
我們點左一個野山參培養根參雞湯一個普通乌雞湯
湯底好濃，但兩隻雞肉味我唔覺有分別。由於我們唔鍾意D飯混入個湯，所以先將雞取出再取拆肉食
佢個蘿蔔泡菜同蒜頭都又幾好食喎
食飽飽返酒店，當時大約11點幾，我們想坐的士，點知第一個司機唔識路，第二個唔肯睇標
佢開W16000，我老闆又好攰，咁就是但喇，但之後幾日發現原來佢坑左我們W10000成$70港紙，果段路好近咋，之後幾日坐都係W6000幾~~~~
沒有留言:
張貼留言