小野貓生活札記: 19年馬爾代夫船宿潛水之旅-潛水篇

今次個船宿包左17潛，基本上每日三潛，最後一日得兩潛，會潛水的只有19人
每日潛水日程大致相同，早上大約6點便要集合聽潛水簡介，上午可以享用免費咖啡，之後上船潛水，大約6：30-6：45下潛，之後便是早餐時間，小睡片刻便到第二次潛水，午餐再小睡，之後便是下午潛水再小睡，晚餐
都唔知點解可以咁好瞓，一日瞓幾次哈。。。哈

潛水隊服務基本上不太專業，這一次潛水經驗讓我學懂要自己照顧自己更多以及要警覺一點。以往去其他其方潛水潛導都會照顧得我們很好，但這次潛導相信經驗不足，經常因害怕迷路而緊緊跟貼前一隊（後來有兩次真的迷路了，結果要上潛水面看清方向再下潛，很是無奈），不協助尋找生物之餘亦沒有機會讓我們好好欣賞及拍照，讓我們不要游近礁石，但唔游近睇咩呢？只會係咁叫我們游快D追前面一隊，追到時又因為前面一隊仍在觀察海洋生物或在拍照便叫我們停下等，這情況還經常出現，過了兩天我們跟韓國人都決定不再聽他的，係礁石慢慢睇
這情況似乎不只我們那一組有問題，因為與另一組韓國人傾計時，他們都表示，他們該組都覺得潛水隊並不專業。

潛水隊雖然不專業，但船上服務很貼心，夜潛上回大船時，便已經準備好一杯杯的熱朱古力迎接我們。夜潛第一次見到咁多鯊魚圍住我們游，真的很興奮，可惜我部機影唔到

今次見到好多我未曾見過之海洋生物，藍色瀨尿蝦睇到影唔到、鯨鯊、有波點嘅魟魚、唔同嘅魟魚。。。。。真係好過癮

今次睇鯨鯊，係先浮潛睇一輪再著潛水裝備，一去到已經好多船係果度，成個海多人到好似維港泳咁

第一次落水時游左陣已經因為條鯨鯊游左去第二度所以潛導好快就大叫「back to the boat」咁大家就係咁好似搶灘式咁游番上船，我老公覺得好戇居，佢唔肯再落，由於佢游水好叻，而我其實係唔係好叻游水，係泳池游一半就要企，我著左wet suit幫手浮，我冇諗過第二次我話落，佢竟然真係唔跟，咁我係爛玩嘅情況下照跳，佢真係唔跟呀，哈。。。，好我照游，跟住人群游左兩下就抬頭再望下究竟應該游去邊，抬頭個潛導指下下面，原來係我下面呀，太興奮低頭低得太多，飲左兩啖水，唔理繼續拍照，影左兩三張D維港泳D泳手上來喇，游到打架咁，我食左幾拳覺得唔安全，所以就唔玩想番上船喇，點知原來架船駛開左好多，我估都有150-200米，我諗佢驚整到人，我果下個心一沉，心諗呢鑊點游呀，不嬲游半個池咋喎，一邊游我一邊諗如果冇力點樣自救。

PLAN A我見其他船有客著左救生衣，如果冇力走去扶一下，但諗下又唔得，人地唔識游水你走過去扶去佢，佢好會好驚，呢個唔WORK
PLAN B 我見仲有好多其他快艇係附近，我諗如果真係冇力，可以係船邊扶一下或者佢地載番我過去
點知係呢個時候PLAN C出現喇，同船的韓國人係我身邊出現，佢應該都係想番船，我一見佢兩眼發光，死跟住佢，我諗如果我唔OK佢會幫手叫人救我，哈哈哈，後來講番韓國人大笑，佢話唔怪之得喇，果下覺得好奇怪，唔知點解我係咁跟住佢，佢又唔係潛導哈。。。其實船上D潛導都緊張架，企晒係船頂果層睇 D客係邊，我停左休息左兩次，每次兩個呼吸，揮左三次手終於潛導見到我喇，叫架船停低，如果唔係真係人都癲，上左船真係死咁滯，即刻隊番條蕉先
大船有蕉，潛水船都有，佢地次次潛完水都係咁叫我們食蕉
之後再著裝備去第二個位，但就見唔到鯨鯊了。