小野貓生活札記: 15年4月九洲11日自駕遊 Day 4~島原、熊本

12/4(日)

早餐非常豐富，我們昨日的龍蝦身同頭今早用來煲麵豉湯，但又唔覺特別鮮甜喎~
豆腐好香就真嘅~~~

食過早餐後，我們便去雲仙地獄散步，入口正正係酒店旁邊，但行山路真係好攰
我們行到去大叫喚地獄便折返，因為再睇都係差唔多既景色，而且我地好累~~~

我地兩公婆對比俾咪好大呢，因為我極度怕涷，而我老公又極度怕熱喎，所以成日都會係咁

不過大叫喚地獄D聲，聽落都真係幾恐怖

係大堂小賣部，買左2條長崎蛋糕，每條¥700,有得試食

仲買左湯煎餅，後來返香港開來食，原來冇乜味道，可以唔駛買

我們CHECK OUT 時女將們及經理都出來送客，經理仲幫我們將車駛到門口俾我地。
我們都唔敢SET GPS，拿拿聲開走部車，之後再停埋一邊搞，費時D女將們係咁等我們。我發現傳統溫泉酒店真係好好服務，我見D日本人俾手提袋佢地拿，佢有一個人專拿手袋，然後好專心咁企係車旁等。但我地真係唔習慣囉

我們去島原睇下鯉魚街，係幾得意既

係D可以入去參觀既屋仔見到有張宣傳附近芝櫻公園既單張

跟住個電話照去，原來係碼頭既觀光案內所，問職員點去，佢俾左張地圖我地，仲手畫埋燈位同便利店，跟住地圖照去無難度~~~

順便我睇埋下班去熊本既船開12:50
好多當地人去芝櫻公園，仲有好多小食攤，好似嘉年華咁。我們都買左士多啤梨，雪糕同串燒。

公園入面有D中學校在除草，見到我們會打招呼

12:40去到碼頭，班船開左？？！！
原來碼頭個鐘快10分鐘架！！但售票處個鐘又正常架wow,下班船要1:40仲要係慢船，因為原來快船有一星期要停駛……我出發前冇check到lol
惟有入碼頭食lunch同睇下手信，再上番車上下網，好快就可以上船。

我們坐船出面，好多遊客準備左蝦條餵海鷗，D海鷗妈瘋狂咁飛晒埋來。小食部又未開，惟有睇人玩。

開左船，D海鷗仲跟住飛，而且我發現開住船D海鷗易D飛埋來。開左船我們都買左蝦條玩

D雀好勁跟住飛足全程，中途見到另一架船，都係一群海鷗跟住飛。

去到熊本，先去黑亭食拉麵，2個人不用等便有位。
入左去已經聞到好香……
叫左一碗有蛋，另一碗冇蛋既拉麵，隻蛋同老公一人一隻用來沾麵，好香……碗麵真係超級無敵勁好好食。

食飽駕車去熊本城，要等車位。
泊好車，買左個高木直子介紹過的嚇一跳團子，味道一般，蕃薯很粉，紅豆唔香

去到熊本城對出開始有少少雨，快快入城，上左一層樓，好累，D樓級好高，我們兩公婆又再一次放棄左，而且落雨嘛，景色一般啫。

去左本殿睇，失望!冇咩好睇，有個櫃放堆衫紐出來話是掘出來的文物，勁！
最衰唔記得影相

之後返酒店泊好車
住Dormy inn, ¥7490一晚,包早餐(超抵)
上浴場浸左一陣，唔記得帶毛巾上去，冇洗頭，浸完見冇人，靜雞雞攞D紙巾印乾個身，返房等左陣老公全頭全面濕晒咁返來，仲有少少怒目，哈哈……佢話佢果面超多人，佢唔想人發現佢冇帶毛巾，係咁浸……

間房真係超細只係開到一個喼