早上享Dormy Inn 一向出名豐富的早餐，而且好多時都會包含當地出名的美食。
例如芥末蓮藕、太平燕、魚餅
其實所謂地道食物味道好一般，如果唔係早餐包埋，我就真係唔會特別去試LOL
食完早餐，Check Out後我們去左郵局寄明信片先
今次搞左好耐~~15-20分鐘，佢地唔知整乜兩三個人圍埋一齊又查書又問人。
中段佢地同我講要買信封入住先可以寄城堡型明信片，咁我話算喇我唔寄喇，想退番明信片俾佢地。跟住佢又話俾佢都唔鍾意用信封入住，佢明白的。
我同佢講早幾日我係福岡寄左圓形同魷魚形都OK，佢話間間郵局都唔同的，真係特別喇~~~
又查完一輪書，跟住同我講￥220寄一張就可以，唉.......真辛苦， 早D講呀嘛，搞一大輪終於寄到明信片喇~~~~
一路駛落去鹿兒島，沿途景好靚，好多樹係兩邊大山
去到鹿兒島見得半缸油，就去入油，油站職員真係好幫你抹車頭同兩邊玻架
入左￥4109
到鹿兒島後我們去了水族館，老公都幾失望，因為都幾細
係鹿兒島同宮崎我發現都好多杜鵑花 ，D路邊同人地D花園全部都係，可能好易種，現在開晒花好靚
我們肚餓想搵野食，就隨便揸部車向熱鬧的地方駛，隨便泊低左停車場後，先發現原來駛左去天文館通喇，咁就上左間迴轉夀司店食夀司
扇貝麵豉湯好鮮
剌身都好新鮮
天婦羅熱辣辣
順便問下侍應姐姐黃熊係邊，原來係街尾
食飽去下黃熊，其實我想食佢上面D芒果就真，D冰無可能食得晒~~~
旁邊有一個日本女仔叫左大份嘅黃熊，先影一輪相再食，但我地兩個點睇佢都冇可能食得晒，兩個人食都好好好困難
之後我們再去仙嚴園，錯過左入車場路口，因為GPS定位係後面，點知大鑊喇，條路一直係咁去又冇路肩或空位可以U TURN，跟進見到路邊有小食店，即刻駛部車上去再調頭，點知條路好繁忙，我地等左好耐先有少少空位可以抽番架車出來。
仙嚴園當日多雲，既睇唔櫻島火山，本身個園都冇咩好睇，匆匆走一轉便離開了
再到天文館通行街，我們覺得呢度比熊本上、下通好行，店舖比較多，而且有比較多橫街
我係山形屋百貨幫同事買手巾，仲見到我想買的「輝」絲襪，又係大量掃貨
係街度，俾我見到有賣木魚同昆布既店，D木魚真係好香
之後俾我見到間賣碗碟既鋪頭大特價，當然都掃左少少。價錢傎係好抵，果兩隻藍碟￥98咋
買完俾左張你買野價格一成之折扣券我下次買野用，好似係￥120，我俾左個日本太太佢勁開心。
之後想返酒店，今晚都係住DORMY INN，￥10190 包早餐
但係我們入左電話個GPS搵唔到，冇晒辧法咁啱有對日本情侶落車，我請佢地幫我地入地址，咁先順利搵到咋
點知去到門口搵唔到停車場，我上去問下喇，咁啱見到有香港人CHECK IN，問下佢地有冇揸車，佢地就教我們點泊車，原來係酒店後面，而且正如佢地所講個牌好細~~~
但係間房大過昨日果間好多，開兩個喼都仲大把位
安頓好便想坐的士去屋台村，個錢包只有D一萬￥，驚司機冇得找，我去7-11買野唔敢買野飲咁平，就是但買左包面膜￥300，果晚試左幾好用喎，之後想係藥妝店搵都唔覺有
後來回港上網查下，原來雪肌粋係7-11專賣的
上左的士，司機同我們講屋台村今晚唔開，我之前搵資料都唔覺佢有定休日???
咁冇計，唯有行去天文館通搵野食，千挑萬選，睇中左呢間
入去都係隨便點D，我地真係好鍾意咁，上菜先知係乜，過程其實好有趣
前菜，魷魚仔，幾好食
應該係包左雞軟骨既肉餅，好味
我們叫左樣有個筍字嘅野，以為會係露筍，原來係燒竹筍，都好味
豬肉火鍋，之前真係冇諗過食豬，雖然佢好出名，成日覺得豬有幾好食呀~~但原來真係可以好滑同好香~~
跟住呢底野喇，有個侍應我們睇佢同D客互動，估佢應該係新來嘅，因為佢成日問另一個侍應。間野得兩個侍應同一個廚師。咁佢上左呢底野再點火。
我就問我老公：喂．．．咁咪燒著塊木板lol
我老公：（佢低頭裝左下）唔會，係木圈來架，圈住個鐵板
我：咁設計幾好喎
我老公：係幾聰明嘅
一會過後
我：E ????有D煙出喎，仲好似有D味，係咪大火得滯燒到個圈呀?
我老公：唔會，可能有D煙燻效果
係呢個時候，廚師（可能都係老闆）跑出來：Oh sorry sorry，跟住熄火，拎起塊野。塊木板黑晒，原來真係木板LOL
個老闆可能心諗：唉．．．今晚真黑仔，個侍應又蠢，兩個客又白痴，係咁睇住塊板燒～～
哈哈，其實係咁至啱，鐵板燒牛。Ｄ牛肉好好味
最後叫左ＸＸＸ燒，點知果侍應話我們知係燒魚.．．．．冇左份驚喜添
但其實都好好食
呢間野Ｄ野真係幾好食～～～
因為冇位，我們吧檯，有個西裝大叔入左來都係坐吧檯，開左佢存係度支日本酒，跟住成晚對住杯酒發愁，又唔叫野食又冇人理佢架喎．．．．．居酒屋原來真係可以咁用嘅．．．
果晚食左幾錢呢? SORRY 唔記得影單，又冇乜印像，但我記得係唔貴，而且覺得都OK抵食嘅
日本OPENRICE找到它的菜單
沒有留言:
張貼留言