早上起床出常好，除左凍之外完全睇唔出昨晚下過大雨
這是酒店房外的風景
早上早餐非常豐富， 比DORMY INN多左好多好多野食，而且好好食
果然係早餐出名豐富，算佢名乎其實喇
可惜早餐個胃太細喇~~~~~
試左冷汁，用來送飯的~~~冇咩特別
CHECK OUT後去左宮崎物產館買手信
TEL：0985227389
因為一心想買D芒果產品做手信所以係一個地方買晒
部份產品有得試食，都幾好味
大力推薦左邊呢隻啫喱，超級香濃芒果味，鍾意既朋友可以大手入貨
佢入面係咁樣一個個嘅
而呢支芒果汁都勁推，上次係石垣買左支 100%返香港，飲左幾次就冇晒，之後念念不忘
係網上見呢度有80%，所以有少少專程過來買支寶貝，我會溝冰飲但唔鍾意溝冰或者想浠D就建議買50%
買左 2大袋手信，開車去高千穗~~~~
中途停左個道之駅好多野買，仲有宮崎芒果，唔算貴，但我老公唔食既，我冇信心自己一個食得晒
結果買左炸蕃薯
途風景都係好靚
嘩段山路仲頭文字D過上次雲仙
老公話有幾個彎要扭晒條軚
近瀑布個車場滿左，要泊另一邊
都好既，如果唔係，我都幾肯定我地兩公婆又會中途又折返
一路行D景色都好靚
我老公係咁問條瀑布係邊
終於去到喇，係真係幾靚嘅
之後老公想折返，但我見就來到終點而且想去洗手間，我見有D屋仔係前面估有廁所卦
果然真係有，而且仲見到人地用溪水養山魚，都幾醒喎
原來流水麵就係呢度，兩間都冇人，咁其中一間「千穗之家」有缸魚係門口，我們就左呢間。
之後都開始有其他客人，但隔離果間就一直都冇客
之前老公話流水麵好似好傻咁，話唔去食，但果日行到熱熱地，去到現場又幾好FEEL，所以都坐低左食。其實真係至在過下癮
另外叫左條燒山魚，好好味。
之後我們行馬路返去車場，條路易行D，唔駛行樓梯級
離過後我們去左高千穗道之站，買左兩串高千穗牛串燒，幾香。仲有一份炭火燒土雞，配埋柚子胡椒，味道一般啫
下一站阿蘇火山，一路上山睇住架車溫度計係咁跌，沿途望落山風景好靚
最後去到纜車站得 6度，凍死人喇~~~~落車影左幾相頂唔住返上車
兩公婆返左上車要暖一陣先開到車，真係好凍呀~~~~
D噴煙相影極都唔靚
跟住去草千里，好DD有8度
馬肉串燒冇開檔，冇得食。我們躲係旅遊車旁影相
見到D人咁凍係路邊等巴士真係好辛苦~~~
我們今晚住南阿蘇，好近火山，一落左山轉個彎就係
竹之山莊，一泊兩食
我全程住宿都係樂天訂
今晚應該係訂左五岳館，得五間房，兩人￥38880
點知CHECK IN 後佢地帶左我們去最平既房，我仲以為我BOOK錯，即刻CHECK 番樂天記綠俾佢地睇，佢地果下都覺得好奇怪，因為我真係訂左五岳。
佢叫我們係房等，佢出去了解下。
搞左好耐佢返番來話對唔住，佢地搞錯左，但五岳FULL 晒，我同佢講我真係唔鍾意呢間房，因為我覺得房外個溫泉池好細。而且我唔鍾意佢好焗促。五岳個池大好多，而且有個花園，仲望住五岳山。
佢帶我去別館，我老公留係房，我去睇，話間房大D，但果池一樣大，但有按摩功能，我去睇完都唔鍾意 LOL，如果我鍾意當時就BOOK左喇，咁我都話算喇，你地又冇房，我都冇辦法，我住番第一間就算。
佢係咁問我，夜晚送酒俾我飲，我話唔要，佢又話果汁，我同佢講我好唔開心，乜都唔想飲。
返到房，我都同老公講算喇，我都同嬸嬸講 is ok la, 咁接待個嬸嬸又用房電話打出去講左輪，可能佢見我真係好失望同唔開心。佢話佢地個公眾浴池開到24:00，叫我們零晨一點去用，可以包場，太瘋狂喇一點喎~~~~~我同佢講算喇，佢又話CHECK OUT TIME應該係10:00，我們可以11:00。
我咪同佢講，我都唔鍾意間房，點會留到 11:00?最後我都不斷同佢講 is ok la, 叫佢出番去做野。
其實間房唔係真係好差，但我12月初已經係樂天訂房，我期望間房真係唔係咁，所以真係好失望。呢間房￥26000
五岳館房間
晚餐好多野食，係鐵板燒，冇可能食得晒，結果剩番D雞肉，雞肉冇乜味道
馬肉刺身，冇也味，好一般
送左個道歉果盤
之後有飯團帶番房做宵夜
返到房床都開好喇
早餐
CHECK OUT 時他們減左￥4000，仲送左袋禮物俾我地，係一袋3KG既米，同四支 500ML既白川名水~~~~~~~~~~~
包米我們都帶左返來，原來又真係幾好食喎。
我之前去台灣好鍾意食台灣米，口感好煙韌，但返香港買左幾種台灣米都煮唔出果種感覺。我成日以為係水唔對，但原來真係未選對米。日本米我都有試過，但真係冇呢種咁煙韌。
之後我們係阿蘇道之駅都有見到呢個牌子既米
其實佢地過程中都好有誠意想補償，但我真係不能掩飾我好失望。
沒有留言:
張貼留言